Frå stein til stål - historia om Stein-Yngve

Endeleg var det vår tur til å bli kjent med Stein-Yngve Iversen, og vi fekk serverte heile historia i 10-års sprang frå den spede starten på steintrappa hos mormor til jobben i Smith Stål Vest. Barneåra vart trakka opp i Lindås og i Arna, drabantbyen på landet der tida gjekk med til fotball, båt og fiske. 20-åra gjekk med til førstegangsteneste på Haakonsvern, som etterkvart sklei over i både fagbrev og befalsskule, og bedriftsøkonomstudier på NHH. Etter seks år på fregatt, med spennande og skremmande tenestetid i blokkaden av ex-Jugoslavia, skifta Stein Yngve beite og vart prosjektingeniør i Datainstrument. Litt fordi førstegangstenesta hadde blitt veldig mykje lenger enn planlagt, men mest fordi han og Annette – dei gifta seg i ’94 – fekk trillingar. Med tre små vart det lite tid til å dyrke eigne fritidsaktivitetar, spesielt sidan ei av jentene var alvorleg sjuk i ein periode, men han fann tid til å bygge hus i Åsane og bygge opp gründerbedrifta Metasystems, ein tøff men lærerik periode i eit skipselektronikkfirma som gjekk frå å ha ein pilotinstallasjon til å ha over 100 installasjonar i skip. Selskapet vart seld og Stein Yngve gjentok suksessen som salsdirektør i Sharecat Solutions, eit skylagringsselskap, samtidig som han trente fram landslagsspelar og NorwayCup-vinnarar på jentelaget til Åsane Fotball. Veka før han fylte femti, flytta han og familien inn i nybygd hus i Ytre Sandviken. To av trillingane studerer i Bergen, engelsk og samanliknande politikk, medan den tredje studerer medisin ved NTNU. Og Stein Yngve? Han har gått via sjakkelsmiing hos Gunnebo Anja til dagleg leiing av Smith Stål Vest, endeleg med nok fritid igjen til å dyrke hyttelivet i Austevoll, båtlivet, og fotballivet.