Rotary i ungdommens teikn!

Den femte tjenesteavenyen i Rotary er ”Nye generasjonar”, ei samling program som skal hjelpe unge menneske på vegen mot å bli gode, samfunnsengasjerte leiarar. Eit av desse programma er Rotary Youth Leadership Award (RYLA), eit leiarutviklingsprogram med mål om å inspirere, motivere og utvikle framtidas leiarar. Eit anna viktig program i Bergenhus Rotary er mentorordninga vi er del av på Amalie Skram VGS gjennom faget ”Ungt entreprenørskap”. For å lære meir om kva Rotary gjer for ungdommen, kom Haakon Ervik, leiarspire frå MatNat, og Nora Grønås, ung entreprenør frå Amalie Skram, saman med Grete Sæbø frå Bergen Syd RK og delte sine erfaringar med oss.

            Haakon er matematikkstudent ved UiB og har i år leia Realistutvalet, det øvste studentorganet ved fakultetet med ansvar for at 3000 studentar år god oppfølging, har eit bra læringsmiljø og at fakultetet følgjer dei lover og reglar som er for studentane. Han fortalte om ei bratt læringskurve som leiar, og kor nyttig RYLA var for han. Forventningane var høge til å lære meir om leiing og organisasjon, men det han lærte var noko mykje viktigare: korleis andre oppfattar han, korleis han er som leiar, og korleis han kan bruke den kunnskapen han har til å gjere noko bra som leiar for andre. RYLA utrusta han dessutan med mange nyttige praktiske verkty, slik som samtaleteknikkar, samarbeidsteknikkar og ulike stilar for leiarskap og når dei bør nyttast.

            Nora har hatt klubbens eigen Harald H som mentor i ungdomsbedrifta ”Sustainable UB”, ei bedrift som importerte og selde kokosnøttskåler, mellom anna på Bergen Julemarknad, og arrangerte ein miljøfestival. ”Ung entreprenørskap” er eit praktisk fag ein kan velje i VG2, der ein skal starte bedrift, etablere den, gjennomføre og avvikle den i løpet av eit skuleår. Nora fortalte om utfordringane dei måtte løyse, prosessen med å danne bedriftsgrupper, registrering av ungdomsbedrifta i Brønnøysundregisteret, korleis dei aktivt nytta nettverka sine for å hale festivalen i land, og kva tipsa og triksa dei fekk frå mentor Harald betydde for dei. Harald avslutta med å dele sine erfaringar med denne gjengen fantastisk dyktige, proaktive elevar.