Med ein biletserie som viste glimt frå oppveksten og innblikk i jobb og fritid fanga Randi merksemda til dei nesten tretti frammøtte då det var hennar tur å ha ego-føredrag. Ego-føredrag høyrast kanskje egoistisk ut, men det er faktisk motsett!

Desse føredraga er ofte eit høgdepunkt fordi føredragshaldaren, som ofte er ny i klubben, deler av seg og sitt med resten av gjengen. Føredragshaldaren fortel om sitt liv og virke og vi blir kjende med personen og får innblikk i eit yrke annleis enn vårt eige. Med gode bilete og illustrasjonar tok Randi oss med gjennom si varierte teneste i Forsvaret. Den unge offiseren og kompanisjefen lyfta fram si interesse og engasjement for leiarskap og kva god leiing er.

Randi trekte fram verdien av å ha gode mentorar. Gjennom mange år har ho både studert og praktisert leiing, og ho har hausta arbeidserfaring nasjonalt og internasjonalt. Med på vegen har ho hatt eit sterkt medvit om spørsmåla «Kva er ein god leiar?» og «Kvifor skal folk følgje meg?» «Ver ein god leiar for folka dine. Då hjelper dei deg vidare.» fekk ho til svar då ho spurde ein mentor om kva som skal til for å bli general. Å sjå etter og å ta utfordringar som dukkar opp, kjenneteiknar Randi. Lite visste vi om at ein tilfeldig førespurnad og sporty innstilling førte til at ho vann NM-sølv i skeleton/aking for nokre år sidan. Elles er det symjing som har vore hennar hovudidrett.

Vi har hatt gleda av å ha Randi i klubben ei stund, og er glade for at ho ville bli rotarianar! Ho trekkjer fram at Rotary opnar verda og horisonten, og legg til rette for å lære noko nytt av kvarandre og føredrag. Og under ego-føredraget til Randi lærte mange av oss mykje nytt, både om Forsvaret, jobben til Randi og ho sjølv. Føredragshaldaren stilte med passande øyredobbar kjøpte på distriktskonferansen i helga.

Randi Solberg og Innkommende president Harald Goldstein etter foredraget.

Teksten til dette oppslaget er forfattet av Turid Astrid Reksten.

Publisert av Sigbjørn Haugland 10. oktober 2018